50. สงฺขฺยาย สจฺจุ+ตี+สา+ส+ทสนฺตายา+ธิกา+สฺมิํ สตสหสฺเส โฑ

สตฺยนฺตาย อุตฺยนฺตาย อีสนฺตาย อาสนฺตาย ทสนฺตาย สงฺขฺยาย ปฐมนฺตาย อสฺมินฺติ สตฺตมฺยตฺเถ โฑ โหติ, สา เจ สงฺขฺยา อธิกา โหติ, ย+ทสฺมินฺติ, ตํ เจ สตํ สหสฺสํ สตสหสฺสํ วา โหติฯ วีสติ อธิกา อสฺมิํ สเตติ วีสํสตํฯ

139. เฑ สติสฺส ติสฺสติ

เฑ ปเร สตฺยนฺตสฺส ติการสฺส โลโป โหติฯ เอกวีสํสตํ สหสฺสํ สตสหสฺสํ วาฯ ติํสติ อธิกา อสฺมิํ สตาทิเกติ ติํสสตํ เอกติํสสตํ อิจฺจาทิฯ อุตฺยนฺตายนวุติ อธิกา อสฺมิํ สตาทิเกติ นวุตํสตํ สหสฺสํ สตสหสฺสํ วาฯ อีสนฺตาย-จตฺตาลีสํ อธิกา อสฺมิํ สเต สหสฺเส สตสหสฺเสติ จตฺตาลีสสต+มิจฺจาทิฯ อาสนฺตาย เอวํ, ปญฺญาสํสต+มิจฺจาทิฯ ทสนฺตาย-เอกาทสํสต+มิจฺจาทิฯ

51. ตสฺส ปูรเณ+กาทสาทิโต วา

ฉฏฺฐิยนฺตาเย+กาทสาทิกาย สํขฺยาย โฑ โหติ ปูรณตฺเถ วิภาสาฯ สา สํขฺยา ปูริยเต เยน ตํ ปูรณํฯ เอกาทสนฺนํ ปูรโณ เอกาทโสฯ อญฺญตฺร ‘‘ม ปญฺจาทิกตีหี’’ติ โม, เอกาทสโมฯ วีสติยา ปูรโณ วีโส วีสติโม, ติํโส, ติํสติโมฯ วาสทฺทสฺส ววตฺถิตวิภาสตฺตา นิจฺจํ จตฺตาลีโส ปญฺญาโสฯ

52. ม ปญฺจาทิกตีหิติ

มปจฺจเย ปญฺจโม, ปญฺจมีฯ สตฺตโม, สตฺตมีฯ อฏฺฐโม, อฏฺฐมีฯ กติโม, กติมี อิจฺจาทิฯ

53. สถาทีน+มิ จติ

สตาทีนํ โม จ อนฺตาเทโส อิ จฯ สตสฺส ปูรโณ สติโม, สหสฺสิโมฯ

54. ฉา ฏฺฐ+ฏฺฐมาติ

ฉสทฺทา ปูรณตฺเถ ฏฺฐ+ฏฺฐมาฯ ฉนฺนํ ปูรโณ ฉฏฺโฐ, ฉฏฺฐโมฯ อิตฺถิยํ ฉฏฺฐี, ฉฏฺฐมีฯ ‘‘จตุตฺถทุติเยสฺเว+สํ ตติยปฐมา’’ติ นิปาตนา ปูรณตฺเถ ทฺวิโต ติโย ทฺวิสฺส ทุ จ, ติจตูหิ ติสฺส อ, ติย+ตฺถา จ ยถากฺกมํ, ทุติโย ตติโย, จตุตฺโถฯ

55. เอกา กา+กฺย+สหาเย

‘‘สติ พฺยภิจาเร วิเสสนํ สาตฺถกํ’’ติ ญายา สํขฺยาโต วิเสเสตุํ ‘‘อสหาเย’’ติ วุตฺตํฯ เอกสฺมา อสหายตฺเถ ก+อากี โหนฺติ วาฯ เอโกว เอกโก, เอกากี, เอโก วาฯ

56. วจฺฉาทีหิ ตนุตฺเต ตโร

วจฺฉาทีนํ สภาวสฺส ตนุตฺเต=กิญฺจิมตฺตาวเสเส ตโร โหติฯ โส=สโก ภาโว สภาโว อตฺตนิยปวตฺตินิมิตฺตํฯ สุสุตฺตสฺส ตนุตฺเต วจฺฉตโร, อิตฺถิยํ วจฺฉตรีฯ โยพฺพนสฺส ตนุตฺเต โอกฺขตโรฯ โอกฺขา=ทุติยวยฏฺฐโคโณฯ อสฺสภาวสฺส ตนุตฺเต อสฺสตโรฯ คาโวติ ชาติสามตฺถิยสฺส ตนุตฺเต อุสภตโรฯ เอตฺถ ตนุตฺตํ อปฺปพลตาฯ